<

XOG: Mashruuca Shaqada Loogu Abuurayo kun-ka Dhalinyaro G/Banaadir oo ku dhaw Fashil…

Maamulka Gobolka Banaadir ayaa shaaca ka qaaday in shaqo loo abuurayo Kun Dhalinyaro ah oo kamid ah kuwa kunool Degmooyinka gobolka Banaadir, waxaana Degmo kasta laga soo qorayaa in ka badan 50-Dhalinyaro ah.

Shaqooyinka loo abuurayo Dhalinyarada ku dhaqan Gobolka Banaadir ayaa shaqooyin Farsamo, nadaafada gobalka iyo abaabulka dhalinyarada waxaana maamulka Gobolka Banaadir shaaciyeen in mushaarka shaqadaasi uu noqon doono lacag dhan 150-Dollar bishii balse ay jiri doonaan lacago laga jaro si aad horay idiinla wadaagnay documents caddeyn u ah.

Afhayeenka dhanka hawlgalada Ururka Al Shabaab C/casiis Abuu Muscab ayaa uga digay dhalinyarada Muqdisho in ay qeyb ka noqdaan barnaamijka shaqo abuurka gobolka Banaadir wado , waxa uuna tilmaamay in shaqo aysan jirin balse dhalinyaradaasi laga dhigayo Askar Sirdoon ah.

Waxa uu sheegay Afhayeenka in ay beegsan doonaan kuna dili doonana wadooyinka dhalinyarada magaalada Muqdisho ee qeyb ka noqda Mashruucan shaqada loogu abuurayo , waxa uuna uga digay Waalidiinta dhalay dhalinyaradaasi in ay ceshtaan.

Tan iyo markii ay soo baxday Hanjabaada Al Shabaab ayaa waxaa cabsi xoogan lasoo daristay dhalinyaro badan oo damac uga jiray in ay qeyb ka noqdaan Barnaamijkan Shaqo Abuurka ah, waxaa sidoo kale ka laabtay Shaqo abuurkan dhalinyaro horey isku qoray.

Dhalinyaro badan ayaa sheegay in markii hore aysan ku qanacsaneyn Mushaarka bishii la dhiibayo oo ah mid aad u yar hadana ay soo korortay cabsi xoogan oo ku aadan Hanjabaada kasoo yeertay kooxda Al Shabaab.

Magaalada Muqdisho waxaa kunool kumanaan dhalinyaro ah oo kasoo baxay Jaamacadaha iyo Dugsiyada sare ee dalka, dhalinyaradan ayaan heysan wax shaqo ah oo noloshooda ku maareeyaan waxa ayna taa badalkeeda iska joogaan xaafadahooda.


Shabakada Badweyn.com Kala Soco Wararkii Ugu Danbeeyay

Nagala Xiriir E-mail Badweynnews@hotmail.com

Fikradaha Akhristayaasha (0)




.